Administrasjonen har vurdert dei eldste reguleringsplanane, og foreslår oppheving av 28 av desse. I løpet av året vil dei berørte grunneigarane og andre rettshavararar få brev der det er vist kva planområdet der eigdommen deira ligg er regulert til i desse gamle planane, og kva arealbruksformål kommunedelplanen viser. Dei vil får ein uttalefrist på 6 veker, og etter vurdering av innkomne merknader legg vi fram spørsmålet om oppheving til politisk handsaming.

Det er viktig å ha oppdaterte planar for å vareta formålet med plan- og bygningslova § 1-1 om m.a. berekraftig utvikling, medverknad og forutsigbarheit. Det vil gi betre informasjonsflyt, og på sikt frigjere ressursar. 

Når ein reguleringsplan blir oppheva utan å bli erstatta av nyare plan, er det overordna plan som blir gjeldande. I dei planområda der det ikkje foreligg nyare reguleringsplan blir kommunedelplan for Ålesund kommune, vedtatt 09.03.2017, gjeldande. 

I dei fleste tilfelle er deler av dei gamle planane delvis erstatta av nyare plan, og ein nyare plan gjeld over ein eldre. I deler av planområda som er erstatta av nyare plan vil opphevinga ikkje få nokon konsekvensar, og eigarane blir ikkje tilskrivne.

For dei aller fleste grunneigarar og rettshavarar vil ikkje opphevinga ha anna praktisk betydning enn ei litt enklare sakshandsaming ved søknadspliktige tiltak.          

Søknadspliktige tiltak i eit område med eldre reguleringsplan vil ofte møte krav om utarbeiding av ny reguleringsplan, på lik linje med område utan reguleringsplan. Mindre tiltak der det ikkje blir kravd ny plan, vil ofte utløyse dispensjonsbehandling frå den eldre planen. Derfor har dei gamle planane liten verdi.

Plan- og bygningslova

Der er krav i plan- og bygningslova §12-4 om at dersom ein reguleringsplan er 10 år eller eldre, må kommunen vurdere om planen er oppdatert før tiltak kan setjast i verk. 

Lova seier også at kommunen skal sikre at reguleringsplanar har eit forsvarleg kvalitetsnivå og fylgjer opp nye arealpolitiske føringar. 

Planar som ikkje tilfredsstiller dette bør opphevast. 

Har du fått brev?

Dersom du har merknad til eit framlegg om oppheving, sendast denne på e-post til: postmottak@alesund.kommune.no eller per brev til: Ålesund kommune, VS Plan, byggesak og geodata, postboks 1521, 6025 Ålesund innan seks veker etter utsendt brev.