Det blir anbefalt ei oppfrisking av vaksinen mot polio, stivkrampe, kikhoste og difteri kvart tiande år. Er det meir enn 10 år sidan sist, bør du ta ei ny dose for å oppretthalde immunitet i samfunnet.

Ut over dette er anbefalte vaksinar avhengig av kva land du skal reise til. For innreise til nokre land er det og eit krav om spesifikke vaksinar for å få komma inn. Du finn meir informasjon hos Folkehelseinstituttet.

For dei fleste vaksinane tar det minst 1-2 veker før du er beskytta, og nokre blir gitt to eller fleire gonger for å få full verknad. For å få optimal effekt av vaksinasjon, bør ein difor starte i god tid før avreise. Det kan og vere noko ventetid på reisevaksinar, så vi oppmodar om å bestille time så snart du veit at du skal ut og reise.

Før reisevaksinasjon vil helsepersonell spørje deg om følgjande:

• Har du hatt reaksjonar etter tidlegare vaksinar?
• Har du tidlegare hatt nokon allergisk reaksjon på legemiddel eller anna?
• Har du kronisk sjukdom? Spesielt viktig er det å få vite om sjukdom som påverkar immunforsvaret.
• Bruker du medisinar? Spesielt allergivaksine, kortisonpreparat eller andre medikament som dempar immunforsvaret.
• Er du gravid eller planlegg du å verte det?
• Har du fått blodoverføring eller andre blodprodukt dei siste månadane?
• Har du fått anna vaksine dei siste 4 vekene?

Dette er viktig for å sikre deg mot potensielt alvorlege biverknadar, og for å kunne gi deg vaksine som er best mogleg tilpassa di helse.

Alle vaksinar som vert gitt i Norge skal registrerast i det nasjonale vaksinasjonsregisteret, SYSVAK. På Helsenorge.no - Mine vaksiner kan du logge deg på for å sjå status på dine eigne vaksinar, samt vaksinar gitt til dine barn som er under 16 år. Her finn du:

• Alle vaksinar gitt gjennom barnevaksinasjonsprogrammet sidan 1995
• Reisevaksinar og andre vaksinar, til dømes influensavaksine, gitt sidan 2011

Sidan helserettsleg myndigheitsalder i Norge er 16 år, har ikkje føresette tilgang til barna sin vaksinasjonsstatus etter deira 16-årsdag. Buypass ID blir tilbydd frå fylte 13 år, frå og med våren 2018. Dersom du er mellom 16 og 18 år, kan du utan Buypass ID bestille vaksinasjonskort direkte frå Folkehelseinstituttet.

Utanriksdepartementet gir løpande reiseråd for alle land Norge har diplomatiske forbindelsar med. På deira sider finn du praktisk reiseinformasjon, reiseråd og informasjon om kva slags tenestar og bistand norske borgarar kan forvente av utanrikstenesta.

Under kvart enkelt land finn du blant anna praktiske opplysningar, sikkerheitsinformasjon, innreisereglar og relevant informasjon om landet sitt helsetilbod. Det er den reisande sitt ansvar å gjere seg kjent med innreisereglane til det enkelte land.

Reiseregistrering.no er eit tilbod til reisande om å registrere kontaktopplysningar hos Utanriksdepartementet. Dersom det skjer ei alvorleg hending, har Utanriksdepartementet moglegheit til å sende deg informasjon på SMS eller e-post.

Reiseregistrering er frivillig, men anbefalast særleg ved reiser til risikoland. Til dømes land med høg risiko for naturkatastrofar, politisk ustabile land eller konfliktområde.

Europeisk helsetrygdkort dokumenterar at du har rett til dekning av nødvendig helsehjelp i eit anna EØS-land, på same vilkår som opphaldslandet sine eigne statsborgarar. Kortet bør du ha med deg dersom du skal opphalde deg midlertidig i eit anna EØS-land, eller i Sveits.

Meir informasjon og elektronisk bestilling finn du på Helsenorge.no

Dersom du reiser til land som krev gulfebervaksine, treng du eit gult vaksinasjonssertifikat i tillegg til utskrift frå vaksinetenesta på helsenorge.no. Dette er eit papirsertifikat som er utforma etter WHO sine reglar. Eit slikt gult vaksinasjonssertifikat får du utstedt på klinikkar som vaksinerar mot gulfeber.

Nokre land kan ha utbrot av andre smittsame sjukdommar til dømes meslingar, og krev då at vaksinasjon er dokumentert på internasjonalt vaksinasjonssertifikat før innreise.

Bortsett frå å sørge for naudsynt reisevaksinasjon, er det fleire reglar du bør ta for å unngå å bli sjuk på utanlandsreiser. Her finn du nyttig informasjon.

Rabies er ein svært alvorleg virusinfeksjon, som finst i meir enn 150 land i verda. Smitta blir overført med spytt, via bitt frå dyr. Risikoen for å få rabies er stor, dersom ein vert biten av eit smitta dyr. Sjukdomen er dødeleg dersom ein ikkje får behandling raskt, og før symptom oppstår.

Den vanlegaste smittekjelda er hundar, og det anbefalast difor å unngå kontakt med framande hundar på reise i utlandet.

Dersom du skal reise til eit land med høg risiko for rabiessmitte, er det anbefalt å ta rabiesvaksine. Det er særleg anbefalt dersom du skal opphalde deg der i lengre tid, eller reise i område der medisinsk behandling ikkje er raskt tilgjengeleg. Høgrisikoland omfattar mesteparten av Asia og Afrika.