Student i Ålesund

For skuleår 2025/2026: 
Frå 4. august kan du søke om gratis reisekort for eit studieår, om du er student under 30 år og oppfyller fastsette kriteria.

Kortet er eit reisekort som gjeld for buss, hurtigbåt og ferje i heile Møre og Romsdal. 

Det er viktig å merke seg at om du har nytta deg av denne ordninga tidlegare, kan du ikkje søke igjen.

Ved å melde flytting til kommunen hjelper du oss med å lage endå betre tenester til alle som bur her. Du får sjølv ikkje berre gratis reisekort, men du som student får og fleire rettar, tenester og kan i tillegg påverke politisk.

Dette må du ha på plass før du søker

• Du må vere student ved høgare utdanning (universitet/høgskule/fagskule), ha gyldig studentbevis og betalt semesteravgift.
• Du må studere i eit heilt studieår. Utvekslingsstudentar eller andre studentar som skal vere her berre eitt semester, får dessverre ikkje tilbodet. 
• Du må ha meldt flytting frå ein kommune utanfor Sunnmøre/Vestnes i Romsdal, og fått flyttemelding. Sunnmøre er kommunane Giske, Hareid, Herøy, Fjord, Sande, Stranda, Sula, Sykkylven, Ulstein, Vanylven, Volda, Ørsta og Ålesund.
• Studentar som har nytta seg av tilbodet tidlegare kan ikkje nytte dette igjen.
• Du må ha meldt flytting etter 1. mai 2025.
   

Slik melder du flytting og søker om gratis reisekort

Melde flytting gjer du ved å nytte Folkeregisteret sitt digitale skjema

Søk gratis reisekort

Du må hugse å melde frå til oss om du endrar folkeregistrert adresse ut av kommunen før perioden til reisekortet går ut.

Kortet er aktivert når du mottek det, og er gyldig til og med 31. juli 2026. Fyller du 30 år i løpet av studieåret, vert kortet deaktivert på fødselsdato. 

Praktisk informasjon om tilbodet og reisekortet

Ordninga vart i bystyrevedtak frå 2018 avgrensa til å gjelde studentar som melde flytting til Ålesund frå kommunar utanfor Sunnmøre/Vestnes i Romsdal. Ålesund kommune ønskjer ikkje å påverke folketalet i nabokommunane i negativ lei.

Reisekortet er for studentar og gjeld reise med offentleg buss, hurtigbåt og ferje innanfor Møre og Romsdal. Kortet kan ikkje nyttast på Flybussen, men er gyldig på nattbussen.

Mister du reisekortet i løpet av studieåret og treng eit nytt, må du kontakte FRAM kundesenter på tlf. 71 28 01 00.

Meir om kollektivtilbodet finn du på frammr.no.

• Helsestasjon for ungdom: Gratis tilbod for deg mellom 13 og 25 år
• Andre helsetilbod har du ikkje fastlege i kommunen

• Ung i Ålesund: Kultur- og fritidstilbod for deg mellom 13 og 26 år
• Aktivitetskalenderen Friskus: Oversikt over aktivitetar og frivillige oppdrag nær deg

• Info om kommunen sitt barnehagetilbod.

Studentmeldinga

I januar 2016 vart Ålesund universitetsby gjennom fusjonen mellom høgskulane i Ålesund, Gjøvik, Sør-Trøndelag og Norges Teknisk-Vitenskapelige Universitet (NTNU). Ålesund vart då ein del av Norges største universitet, med til saman 40 000 studentar og 6 900 årsverk. Ved NTNU i Ålesund er det ca. 2 500 studentar. I tillegg har Ålesund ca. 4000 elevar i vidaregåande skolar, folkehøgskolar, kunstfagskole og fagskolen.

Statusen som universitetsby opnar mange spennande moglegheiter og utviklingsperspektiv både for lokalsamfunn og næringsliv i heile regionen. Samtidig gir det kommunen som vertskommune eit særskilt ansvar som må takast vare på. Vertskapsrolla omfattar mellom anna å bidra til at studentane har gode velferds- og helsetenester, botilbud, kollektivtilbod, kultur- og fritidstilbod, studentbustader og barnehagetilbod. Vidare er byutvikling og utvikling av campus sentralt for å vere attraktiv for studentane i dagen og framtida.

Kommunen er òg sentral i å bidra til å knyte studentar og arbeids- og næringsliv tettare saman både for å bidra til kvalitet i studieforløpet og for å auke attraktiviteten for at studentar vel å bli i regionen etter studiane. Sjå gjerne meir i studentmeldinga frå 2019 (PDF, 3 MB).

Campus Ålesund

Ny områdeplan for Campus Ålesund er under arbeid. Det har vore jobba i lang tid med planen, og den er sist revidert 15. mai 2020. Områdeplanen er eit samarbeidsprosjekt under leiing av Ålesund kommune, der ei samhandlingsgruppe med NTNU, NMK, Statsbygg, ÅKP, fylkeskommunen, Studenttinget og Statens vegvesen har vore med. 

Kollektivknutepunkt, parkområde, omregulering frå bustad til campusføremål er nokre av det som er omtalt i planverket.

• Studentsamskipnaden i Ålesund
• Studentorganisasjonar ved NTNU