Sjølv om du berre skal grave i din eigen hage er det lurt å søke om gravemelding. Det kan gi alvorlege konsekvensar for liv og helse å grave over enkelte leidningar. Skader på ledningsnettet kan føre til erstatningskrav. 

• Nokre leidningseigarar er tilslutta den kommunale gravemeldingstenesta, og nokre får denne tenesta levert av kommersielle aktørar. Fleire kabeletatar er tilslutta Geomatikk si løsing. Andre leidningseigarar må kontaktast direkte for informasjon om leidningstrasè.  
• Søknad må sendast begge stadar for fullgod informasjon om leidningar i bakken. 

Reglar og retningslinjer for graving i offentleg veggrunn finn du nedanfor. Der det ikkje er samsvar mellom forskrift og instruks, er det forskrifta som gjeld. 

• Sjå ledningsforskrifta 
• Sjå instruks for gravearbeid på det kommunale vegnettet  (PDF, 313 kB)

I tillegg til eit løyve om å få grave eller legge ned noko i vegen, må ein alltid ha ein godkjent plan for varsling og sikring av det arbeidet som skal gjennomførast. 

Statens vegvesen handterer søknader om arbeidsvarsling, graving og nærføring til riksvegane. 

Fylkeskommunen handterer søknader om graving og nærføring til fylkesvegane. 

Søknad om arbeidsvarsling på fylkesvegane er det Statens vegvesen som handterer, men eit løyve frå fylkeskommunen på graving eller nærføring må leggast ved søknaden. 

Grev du i eit område der eksisterande vegetasjon skal tilbakeførast, må jorda handterast slik at vegetasjonen veks tilbake raskast mogleg. 

Når det blir grave og jordmassar blir flytta, må ein passe på at ein ikkje spreier uønska, framande planteartar. 

Jordmassar og plantedeler infisert med framande artar skal handterast på ein forsvarleg måte i samsvar med § 28 Aktsemdsplikta i Naturmangfaldlova og Forskrift om framande organismer. 

Når eit arbeid blir planlagt skal området undersøkast for uønska framande planteartar. Om det finst uønska planteartar skal dette fyllast ut i skjemaet «Analyse og tiltaksplan for uønska artar» og leverast saman med gravesøknaden. Om det ikkje finst uønska artar skal dette kommenterast i gravesøknaden direkte. 

Bingsa er eit godkjent mottak for både plantedeler og jordmassar infisert av uønska planteartar. For større mengder og levering av jordmassar må det gjerast avtale med Bingsa for rettleiing. Sjå opningstider for miljøstasjonane i Ålesund. Andre deponiplassar kan også vere godkjent om dei følger premissa for forsvarleg handtering av dei aktuelle plantane. 

Ålesund kommune har eit mål om å sikre Ålesund sine tre. 

Når det skal gravast eller arbeidast nær tre skal det bli tatt omsyn til røter, stamme og trekrone. Vi vil unngå å svekke livslengda på trea, skape risikotre eller gjere dei sårbare for sjukdom og skadedyr. 

Når du planlegg arbeid på kommunal grunn må du sjekke rettleiinga for arbeid nær tre og krav for rigg- og anleggsarbeid. Du må utarbeide ein plan for arbeidet som skal følge med gravemeldinga eller søknad om arbeidsløyve.  
 
Alt gravearbeid skal skje utanfor trekronene si ytre avgrensing (dryppsona), og minst 5 meter frå stammen. Avhengig av topografi og opne plenareal med tre kan kravet om avstand vere større. Graving innanfor ei 20 meters omsynssone skal utførast i samråd med forvaltningseininga. Gravearbeid under trekrona skal utførast med luftspade, eller andre metoder etter avtale. Det kan krevast oppsyn av arborist ved graving under eller rundt trekrona. 

Tiltakshaver pliktar å undersøke og vurdere om det er forureina grunn i området. Dersom grunnen er forureina skal tiltakshaver utarbeide ein tiltaksplan som skal godkjennast av kommunen før tiltaket kan gjennomførast. 

Les om bygge- og gravearbeid i forureina grunn.