I samband med at det skal etablerast pumpeleidning langs Tørlevegen til renseanlegget på Kongshaugen, er det no mogeleg å få løyst mange andre utfordringar som har vore til hinder for vidare utbygging. Dette gjeld heilt konkret etablering av gang- og sykkelveg langs Tørlevegen. Dette vil kunne gjere kvardagen tryggare og betre for dykk som alt bur på øyane.
Raude strekninga viser gang- og sykkelveg med samordning, medan blå strekning er berre med oppgradering av leidningar.Kva bygger vi?
Når vi skal bygge gang- og sykkelvegen, er det ein del anna som også må på plass. I tillegg til bru, må det mellom anna på plass to par busstopp, nytt kryss i Hankane, ny tilkomstveg til naustrekkje i Årvika og snarveg til same nausta. I tillegg må vi lage møteplassar til erstatning for dei vi tek vekk, samt flytte fylkesvegen sørover forbi nausta, for å få plass til gang- og sykkelvegen.
Samspel opnar for moglegheit
Etablering av pumpeleidninga til Kongshaugen opnar for at vi saman kan bygge gang- og sykkelvegen frå Vegsundrabben til krysset med Hankane. Samkøyring av disse prosjekta, og samordning med andre aktørar, vil gi billegare utbygging av gang- og sykkelvegen. Politikarane i kommunen har sett av pengar til kommunen sin del av gang- og sykkelvegen, og også vedteke å forskotere utbyggjarane sin andel. Til saman var prosjektet berekna å koste om lag 66 millionar kroner. Etter nærare detaljprosjektering viser det seg at det er fleire usikkerheiter knytt til prosjektet. Meir om kostnadsfordeling og usikkerheit rundt kostnader under.
Å bygge gang- og sykkelveg samtidig med pumpeleidninga er ei unik moglegheit til å få på plass prosjektet med gang- og sykkelvegen, men det legg også eit tidspress på prosessen. Særleg gjeld det utbyggingsavtalane, som vi er avhengige av å få på plass ganske raskt for å kunne bygge gang- og sykkelveg samtidig med pumpeleidninga.
For å kunne sette i gang bygging av gang- og sykkelvegen og bruke denne moglegheita som er no, er vi avhengige av at alle er med på avtalene. Dersom vi ikkje kjem i mål med avtalane, vil det ikkje verte ei utbygging i denne omgang.
Utklipp frå vestleg del av planlagt gang- og sykkelveg langs Tørlevegen.
Utbyggingsavtalane vil gjelde for deg som eig ubygd eigedom som er regulert til utbyggingsformål i regulerings- og arealplanar.
Ein utbyggingsavtale er ein avtale mellom utbyggjarar / grunneigarar og kommunen om delinga av kostnadar ved utbygging av infrastruktur, slik som gang- og sykkelvegen i dette tilfellet. Denne er lik for alle partar, med unntak av summen, som er rekna ut kor stort areal kvar part eig og kva arealet er regulert til. Meir om dette under.
Grunnlaget for fordelinga og avtalane finn vi tilbake i 2018. Der vart alle reguleringsplanane endra med rekkjefølgekrav om utbygging av gang- og sykkelvegen, og prinsippsaka om fordeling vart vedteken.
Prinsippsaka og vedtaket finn du her. (PDF, 874 kB)
Prinsippsaka og grunnlaget for fordeling og berekning er vidareført i kommunestyret sitt vedtak frå 2025, men no ut frå dagens forventa kostnadsnivå.
Kommunestyresaka frå 2025 finn du her. (PDF, 443 kB)
Før vi kan legge fram endelege kostnadar, må vi kome nokre steg lenger i den prosessen som vi no er i. For å gjere det lettare for dykk å forhalde seg til denne prosessen har vi rekna ut foreløpige tall, ut frå dei siste forventa kostnadane vi har, i tillegg til eit alternativ der vi tek høgde for at kostnaden til ny bru aukar med 20 millionar kroner.
Om vi kjem i hamn med avtalane med dykk, forskotterer kommunen dykkar del av det gang- og sykkelvegen vil koste. Vedtaket seier også at du som utbyggar/grunneigar ikkje treng betale tilbake dette før eigedomen vert utbygd, og dette heftet må tinglysast på eigedomen fram til det er betalt. Tilbakebetalingsbeløpet vert regulert for både konsumprisindeks og rente (kommunen sine finansutgifter sidan kommunen må låne desse pengane). Du kan sjølvsagt velje å betale før utbygging av eigedomen din og dermed unngå ekstra finansielle kostnader.
Utan meirverdiavgift
Ein av dei store fordelane ved at det er kommunen som no bygger ut, er at andelen de som utbyggjarar no skal dekke i hovudsak vert utan mva. Dersom de som utbyggjarar sjølve skal stå for gjennomføring av prosjektet på eit seinare tidspunkt, er det tatt ei lik deling mellom kommunen og utbyggjarar av tilbakeført mva. Det betyr at du ved å inngå avtale no ikkje skal betale meirverdiavgift medan du ved ei seinare utbygging i eigen regi må betale halvparten av meirverdiavgifta.
Kostnadane som de som utbyggjarar skal betale er vekta med 50% for arealet som kan byggast ut (tomtestørrelsen) og 50% på utnyttingsfaktoren (BYA). Dette er vanleg praksis i refusjonssaker, der areal har ulik grad av utbyggingstettheit, slik at det skal verte mest mogleg rettferdig fordeling. BYA er vurdert etter vedtatte reguleringsplanar for området. Områda som er avsett til bustader i kommunedelplan, men som enno ikkje er ein del av ein reguleringsplan, har same BYA lagt til grunn. Desse områda har i tillegg vore justerte for areal som går med til fellesområde, slik at dei no er direkte samanliknbare.
Her er oppdatert kostnadsoverslag og fordelingsnøkkel (PDF, 111 kB)
Fordelingsnøkkel frå 2018 finn du her (PDF, 111 kB)
Ålesund kommune som grunneigar
Ålesund kommune eig fleire eigedommar i området og skal bidra med sin del av utbyggjarane sin andel gjennom eigedomsføretaket i kommunen (ÅKE KF). Totalt er dette om lag. 35 prosent av det utbyggjarane skal dekke.
Dei som eig grunn der leidningar, gangveg og veg skal opparbeidast har vorte kontakta for eigne avtalar om erverv / kjøp av grunn og sikring av rettar til leidningsanlegget. Dei som i tillegg eig ubygd tomt til bustad eller naust, må ein også ha ein utbyggingsavtale. Utgiftene til erverv, eventuelt ekspropriasjon, av grunnen som gangvegen med tilhøyrande tiltak skal byggast på, skal dekkast gjennom utbyggingsavtalen.
Samordning og fordelar
Prosjektet var opphaveleg fra krysset til Hankane og fram til eksisterande gang- og sykkelveg i aust. Sidan vi også samordnar med anna infrastruktur i slike prosjekt, er prosjektet utvida fram til Tjørsundbrua, for å ta med samanhengande ny forsyning for høgspent, vatn, gatelys og fiber. Det betyr at samordninga også gir sikrare forsyning til Humla og Tørla . Denne delen av prosjektet skal ikkje dekkast av utbyggingsavtalen.
Samordning med andre aktørar betyr at dei tek sin del av felleskostnadane i tillegg til sine eigne kostnadar. Slik blir andelen som skal fordelast i utbyggingsavtalen mindre og det vert billegare når fleire tek ein del av rekninga.
Status framdrift
Fram til no har administrasjonen i kommunen arbeidd med å få prosjektet klart til utlysing av anbodskonkurranse. Då kan vi også kan gi eit meir tydeleg kostnadsbilde for avtalen.
Prosjektet har vore delt i to delar, der den største fysiske delen er gang- og sykkelveg på sjølve Tørla, og den andre delen er bru-løysinga over Tjørsundet. Planen er at desse vert lyst ut i to ulike anbod, og at dei kan gå føre seg uavhengig av kvarandre.
Gang- og sykkelvegen har vore prioritert fordi det hasta å få til samordning med pumpeleidninga på strekninga. Difor har vi kome lengst i prosjektering og detaljeringsgrada på den.
Likevel er det framleis uavklarte moment som gjer at vi foreløpig ikkje kan lyse ut anbodskonkurranse. Mellom anna må vi få signerte utbyggingsavtalar med dykk først og få svar på byggesøknaden. I byggesøknaden er det spesielt dispensasjonen som går på å flytte heile fylkesvegen sørover ved det bratte partiet ved nausta som er mest omfattande. Dersom dette ikkje går gjennom, må det oppførast mur mot nausta, noko som vil endre kostnadene.
Detaljprosjektering på bruløysinga er i gang, men det vil ta noko tid før denne er landa. Løysinga med påhengt bru let seg ikkje gjennomføre. Det betyr at vi må ei ny runde med konseptutreiing for ei frittståande gang- og sykkelbru, som også vil bli ei dyrare løysing.
De vert orienterte etter kvart som vi får meir oversikt over kostnadar og moglege løysingar Første steg blir ei ny politisk sak for å auke rammene, slik at vi arbeide vidare mot ei løysing som kan få godkjenning av Vegdirektoratet.
Kva skjer vidare?
Grunneigarar/utbyggarar vil snart får eit utkast til avtale, som tek i vare dei momenta som vi har informert om her. Vi ynskjer også å gjennomføre eit orienteringsmøte. Nærare informasjon om møtet kjem seinare.
For å kome i mål med gang- og sykkelvegen må vi ha ferdige signerte avtalar innan midten av januar 2026.