Ny arealdel 2027-2040

Kommuneplanen er kommunen sitt øvste styringsdokument og består av to delar: ein samfunnsdel og ein arealdel. 

• Samfunnsdelen skal innehalde langsiktige mål og strategiar og peika ut retning for utviklinga av kommunen som organisasjon og samfunn. 
• Arealdelen skal vise kommunen si langsiktige samfunnsutvikling gjennom arealbruk og er eit sentralt verktøy for å nå måla i kommuneplanen sin samfunnsdel.  Arealdelen er juridisk bindande og består av eit plankart, føresegner og ei planomtale.

Les meir om kommuneplanen

Utfordringsbildet til kommunane i Noreg er komplekst og omfattande. Forventningane til kommunane si handtering av både tenesteproduksjon, klima- og miljøtrugslar og behov for samfunnsutvikling er høge.

Vi blir fleire eldre, forskjellane aukar,  klima-, natur- og miljøutfordringane veks, det same gjer behovet for kompetent arbeidskraft. Dette er nokre av utfordringane også Ålesund kommune står ovanfor i tida framover. 

Den demografiske utviklinga i kommunen tilseier at vi i 2050 er færre yrkesaktive og fleire eldre enn i dag. 

Forholdet mellom den eldre og den yrkesaktive delen av befolkninga vil gradvis endrast i åra som kjem.

Det blir samstundes lagt opp til at fleire skal bu heime lengst mogleg. Gjennom arealplanen kan kommunen legge til rette for at det kan byggast gode bustadar der folk kan bu i alle fasar av livet, og i nærleiken av dei tenestetilbod og aktivitetar som trengs. 

Du kan lese meir om utfordringbildet i forslag til planprogram her:

Planstrategi 2024-2027

Ålesund kommune har ei stor breidde, både geografisk, befolknings- og næringsmessig. Dette viser seg i aktuelle problemstillingar og tema for arealplanarbeidet.  Ved utvikling og forvaltning av areala våre skal vi ta omsyn til, og femne om denne breidda. Samstundes må vi redusere konsekvensane arealbruken vår har for naturen og klimaet, og vi må tilpasse arealbruken klimaendringar som auka nedbør, ekstremvêr, stormflo osv.  

I arbeidet med ny arealdel må vi forhalde oss til ei rekke retningslinjer og strategiar frå staten og fylkeskommunen, saman med kommunen sine eigen overordna planar, strategiar og politiske vedtak. Dette står det meir om i planprogrammet kapittel 4.  Ein regional plan legg vi særskilt vekt på som kunnskapsgrunnlag - plan for areal, klima og transport - PAKT.

Regional plan for areal, klima og transport - PAKT 

Ålesundsregionen med kommunane Giske, Ålesund, Sula og Haram er den største byregionen i Møre og Romsdal. Kommunane fekk, i samarbeid med Statens vegvesen og Møre og Romsdal fylkeskommune, utarbeidd PAKT. Planen omtalar arealbruk og transport i regionen, i eit klimaperspektiv og med FN sine berekraftsmål som fundament.  Ålesund Kommunestyre vedtok planen i 2022.

I PAKT er det lista ei rekke strategiar for utvikling av regionen og Ålesund kommune. Ein del av desse er arealstrategiar og skal innarbeidast i ny arealplan. Planen inneheld også strategiar som er viktige for arbeidet innanfor andre fagfelt og prosessar i kommunen. Til dømes ved utvikling av eigedomsstrategiar og lokalisering av offentlege tenestetilbod, utvikling av kollektivtilbod og parkeringspolitikk, og ved revisjon av hovudplan for vatn og avløp. Planen er ikkje juridisk bindande. For å sikre gjennomføring av strategiane i PAKT, må desse konkretiserast og utdjupast gjennom kommuneplanen sin arealdel.

Med bakgrunn i utfordringsbildet, PAKT og andre føringar og retningslinjer, har vi definert følgjande fokusområde for arbeidet :

• Senterstruktur og bustadutvikling
• Transport og mobilitet
• Næring og energi
• Natur- og grøntareal (inkludert landbruk/jordvern) 
• Sjøareal og havbruk 
• Risiko, sårbarheit og klimatilpassing 

Klima og folkehelse vil vere eit gjennomgripande fokus i heile planprosessen. Vi må leggje til rette for utvikling av eit meir aldersvennleg samfunn og sørgje for at vi forvaltar areala våre på ein måte som fremjar helse, tryggleik og stabilitet no og i framtida. 

Les meir om PAKT