Beredskapsarbeid i kommunen

Kommunen har eit generelt og grunnleggande ansvar for å ivareta befolkninga si sikkerheit og tryggheit innanfor sine geografiske område.

Sist endra 16.07.2026 09.53

Vi arbeider kvar dag for å førebyggje uønskte hendingar og vere førebudde dersom ei krise oppstår.

Heilskapleg risiko- og sårbarheitsanalyse (ROS-analyse) – kva kan skje, og korleis førebur vi oss?

For å førebyggje kriser og vere godt førebudde, må vi vite kva hendingar som kan ramme kommunen. Derfor lagar vi ein heilskapleg risiko- og sårbarheitsanalyse (ROS). Analysen viser kva som kan skje, kor alvorleg det kan bli og kva vi må vere førebudde på.

Det kan vere ekstremvêr, bortfall av straum eller vatn, alvorlege ulukker eller andre kriser. Slik kan vi førebyggje risiko og planleggje korleis vi skal handtere hendingane dersom dei oppstår.

Sjå oversikt over hendingar frå den heilskapelege ROS-analysen. (PDF, 90 kB)

Vi arbeider systematisk for ein trygg kommune gjennom alle tenestene vår. Arbeidet omfattar mellom anna helsetenester, skolar, fritidstilbod, vedlikehald av bymiljø og klimatilpassing. Slik reduserer vi risikoen for uønskte hendingar og konsekvensane dersom dei skjer.

Kommunale verksemder med ansvar for samfunnskritiske tenester som vassforsyninga og IKT overvakar drifta kontinuerleg. Dersom det oppstår ei uønskt hending, set dei raskt i verk tiltak for å sikre tenestene og avgrense konsekvensane.

Samarbeid og beredskap

God beredskap krev samarbeid mellom kommunar, nødetatar, frivillige organisasjonar og innbyggjarar. Erfaringar frå større hendingar gir viktig læring og bidreg til å styrkje beredskapen.

Etter brannen på Sukkertoppen har Ålesund, Giske, Sula, Haram og Fjord kommune utvikla eit felles planverk for evakuerte- og pårørandesenter (EPS). Planverket gjer det enklare å støtte kvarandre med personell, lokale og utstyr ved større hendingar, og sikrar ei felles forståing av roller og ansvar.

I Totalforsvarsåret 2026 er samarbeid og beredskap eit særleg satsingsområde. Målet er å styrkje samfunnet si evne til å handtere både lokale kriser og meir alvorlege hendingar. Å øve og samarbeide på tvers av sektorar er ein viktig del av dette.

Stor beredskapsøving 12. oktober

Ålesund kommune gjennomfører ei stor øving for evakuerte- og pårørandesenter (EPS) 12. oktober. Vi søkjer frivillige deltakarar i alle aldrar.

Les meir og meld deg på i nyheitssaka.

Slik er det kommunale beredskapsarbeidet organisert

Kriseleiinga

Kriseleiinga skal handtere uønska hendingar, situasjoner eller tilstandar som ikkje kan handterast av den daglege driftsorganisasjonen. Kriseleiinga skal sørge for eit best mulig situasjonsbilde, vurdere kva konsekvensar det kan ha for kommunen og innbyggarane, og iverksette tiltak for å hindre eller begrense skade på liv og helse, ytre miljø og materielle verdiar i størst mogleg grad.

Rollene i kriseleiinga består av :

Kriseleiar - kommunedirektør
Ordførar /varaordførar
Kommunalsjefar
Politi
Kommuneoverlege
Ålesund kommunale eigedom

Andre støttefunksjonar etter behov, dette kan vere Sivilforsvaret, Heimevernet, Brannvesen, Seksjonsleiarar og verksemdsleiarar.

Krisestab

Psykososial kriseteam

Kriseteamet er ei tverrfagleg støtte- og rådgivingsgruppe som kan tre i funksjon ved alvorlege ulykker og ekstraordinære kriser.

Kriseteamet inngår som ein del av Ålesund kommune sin beredskap ved kriser og katastrofar. Teamet kan stillast til disposisjon for, og samarbeider ofte med politi, AMK, legevakta og kyrkja. I tenesta inngår fagpersonell frå helse, sosial, skule, politi og kyrkje.

Kriseteamet blir bemanna etter omfanget av hendinga eller ulykka. Teamet kan vere til hjelp i ein akuttfase, men er ikkje meint å erstatte det ordinære hjelpeapparatet.

Teamet er organisert for å trå til på kort varsel ved ulykker og kriser, der det eksisterande apparatet ikkje åleine er i stand til å handtere den oppståtte situasjonen. Dei vil då kunne vere med å møte pårørande, vitne, skadde og andre involverte i ein akuttfase for å yte omsorg, og for å formidle kontakt til eksisterande hjelpeapparat.

Andre aktuelle oppgåver kan vere: - debrifing på arbeidsplass etter alvorleg arbeidsulykke eller dødsfall på arbeidsstaden - akutt omsorg for involverte etter alvorlege valdsepisodar eller drap - omsorg i akuttfasen for overlevande, vitne og pårørande ved større ulykker.

Teieplikt/samtykke

Teieplikta inneber at personellet skal hindre at andre får tilgang eller kjennskap til opplysningar om personlege forhold som dei får vite om.

Pasient og medlem i kriseteamet kan på grunnlag av samtykke godkjenne at teiepliktige opplysningar blir gitt vidare. Opplysningar kan òg givast til samarbeidande personell når dette er nødvendig for å yte forsvarleg helsehjelp til pasienten, med mindre pasienten motset seg dette.

Målgruppe

Alle som bur og mellombels oppheld seg i Ålesund kommune kan nytte seg av denne tenesta knytt til ei hending eller krisesituasjon definert av politiet, AMK eller kommunen.

Vilkår

Det er kriseleiinga i kommunen, politiet, brannvesenet eller AMK som vurderer behov for - og som kallar ut/kontaktar kriseteamet ved ei hending.

Prisar

Kriseteamet er ei gratis teneste.

Lovtilvisingar

Kommunehelsetjenesteloven §1-5 og lov om helsemessig og sosial beredskap.

Sjå også: Statsforvalteren i Møre og Romsdal – Samfunnssikkerhet og beredskap

Kontaktpersonar

Leiar av kriseteamet: Sissel Hagen Rørhus
Nestleiar i kriseteamet er Pål Silseth

Ålesund kommune og politiet

I ei krise bistår vi Møre og Romsdal politidistrikt med ressursar for å redde liv og hindre skade.

Relevante lover og forskrifter

Kommunen sitt beredskapsarbeid er regulert av nasjonale lover og forskrifter, mellom anna:

Hei! Kva ser du etter?