Emblemssanden er eit naturskjønt friområde i bygda Emblem i kommunedel Indre Borgund. Som ein av få tilrettelagde offentlege friområde i kommunedelen er dette eit viktig og godt brukt friområde for mange. Friområdet er ein mykje brukt badeplass i dei indre bydelane i Ålesund.
Storelva frå Emblemsfjellet skil friområdet i to med ei bru som bind dei saman. I vestleg friområde finn ein badeområde med sand og plen, svaberg og aktivitetsområde, mens det i austleg friområde er skog og svaberg fram til bustadområdet Løvika.
Friområdet er sørvendt og lunt. Området er populært for strandliv, bading, strandvolleyball, telting, arrangement og St. Hans-feiring. Det er også gode forhold for å klatre på bergveggar, dykke, fiske, utfart for kajakk og kano, og å ha piknik på ein av rasteplassane. Det er også ein læringsarena for skule og barnehage.
Emblemssanden friområde forvaltast av Ålesund kommune.
Sjekk kvaliteten på badevatnet!.
Tilbod og fasilitetar
I vest ligg den mest populære marka og stranda for soling og bading. Her finns det rasteplassar med grill og bålplass.
Langs turvegen finn du ein bergvegg på nordsida der ein kan klatre. Lengre inne er det ein huk med rasteplassar og utplasserte grillar og bålplassar, gapahuk, fire strandvolleyballbaner, og open mark der det blir arrangert St. Hans-feiring med tilhøyrande bål.
I søraustleg del er eit stort skogområde og berg der det er fint å både gå, leike og bade.
Ved den vesle parkeringsplassen nærast friområdet er det sanitæranlegg og renovasjonspunkt.
Telting er tillat i friområdet i samsvar med allemannsretten i Friluftslova.
Friområdet er delvis lagt til rette for brukarar av elektrisk rullestol. Sjå meir informasjon på Norgeskart.no, temakart tilgjengelegheit.
Korleis kome dit?
Du kan komme til Emblemsanden med bil, til fots og med sykkel på eigne gang- og sykkelvegar. Nærmaste busstopp er «Emblemsvåg» på R60 og «Ludvigdalen» på Flisnes. Det er tilkomst via turvegar frå bustadområda.
Turløypa går frå parkeringa til Emblemsanden i vest, gjennom friområdet mot aust. Frå den opne sletta med sandvolleyballbanene kan du enten gå raskaste veg og følge Storelva oppover og komme ut til Haslebakken, eller gå ein større tur langs berga og furuskog der du passerer Krokaneset, Tangeskjæret og Klebergshammaren via gangbrua i aust, og ende opp i Løvika.
Friområdet er universelt utforma frå den vesle parkeringsplassen nærmast friområdet, og derfrå til friområdet mot aust. Det er også eit slakt område for tilkomst over plen til friområdet frå bommen og vestover.
Klebergshammaren er eit bergverk. Dette er eit arkeologisk minne som er freda. Bergverket har blitt datert til å vere frå yngre jernalder (550-1050 e.v.r) til mellomalder (1050-1500 e.v.r). Du kan sjå synlege restar i dag ved ein rekke inskripsjonar i dei brune steinane som er att.
Emblemssanden er eit variert område med strand, knausar, skog, svaberg, berg og elv. Floraen består av både furuskog og lauvskog.
Av viktige artar er det registrert gul slimvokssopp ved Sandane i vest, og ask ved elveutlaupet og langs Storelva oppover. Litt vest for friområdet er det ifølgje eldre opplysningar yngleområde for fiskemåke og tjeld.
Litt utafor Emblemssanden, i Storfjorden, er det ein større tareskog med stortare. Den har registrert verdi som «viktig» innan marin naturtype.
Storelva, som renn gjennom friområdet og ut i fjorden, er forsynt av Austrheimselva, som er den største elva i Emblem på 6,5 kilometer. Kantvegetasjon er viktig å ta vare på for å beskytte leveområda for organismar som lev i elva.
Det er laks og aure i elva som kan fiskes etter løyve frå grunneigar. Frå berga kan ein fiske og rake krabbe når det er sesong for det, utan løyve.
Emblemssanden er eit statleg sikra friluftslivsområde med verdiklasse svært viktig friluftslivområde. Et mindre område ved strandvolleyballbanene er ikkje omfatta av det sikra området.
Friluftslivsområda skal vere tilgjengelege og attraktive å bruke. Ein skal samstundes også vise omsyn til viktige natur-, kultur-, og landskapsverdiar i områda. Forvaltninga skal skje i tråd med prinsippa i lova om forvaltning av naturens mangfald