Atlanterhavsparken får Ålesund kommune sin miljøpris 2026.
Atlanterhavsparken
Miljøprisen 2026 går til Atlanterhavsparken
Hovudutval for teknisk, miljø og samferdsel har tildelt miljøprisen 2026 til Atlanterhavsparken.
Juryen trekkjer fram Atlanterhavsparken sitt viktige arbeid med å skape kunnskap, engasjement og forståing for livet i havet. Kvart år får meir enn 200 000 besøkande innsikt i biologisk mangfald, berekraftig ressursforvaltning og kvifor eit friskt hav er avgjerande for framtida.
Atlanterhavsparken blir også løfta fram for sitt systematiske arbeid med å redusere eiga miljøpåverknad gjennom energieffektivisering, avfallsreduksjon og berekraftige løysingar i den daglege drifta. Etableringa av Noregs første marine vitensenter blir trekt fram som eit viktig bidrag til læring og framtidstru hos barn og unge.
Byggeskikkprisen 2026 går til Johangarden på Sperre
Sara og Rune Johan Sperre får byggeskikkprisen 2026 for restaureringa av Johangarden på Sperre.Ålesund kommune sin byggeskikkpris blir tildelt Sara og Rune Johan Sperre for restaureringa av Johangarden på Sperre.
Våningshuset frå 1874 er ein del av det historiske gards- og sjømiljøet på Sperre. Gjennom eit omfattande restaureringsprosjekt har ekteparet gitt huset nytt liv som familieheim, samstundes som dei historiske kvalitetane er tekne vare på.
Juryen peikar særleg på korleis prosjektet balanserer omsynet til kulturhistoriske verdiar med moderne bustadbehov. Mellom anna er viktige fasadedetaljar tilbakeførte med utgangspunkt i historiske fotografi, og nye vindauge er utforma etter antikvariske prinsipp.
Kunstnarprisen 2026 går til Simon Wågsholm
Ålesund kommune sin kunstnarpris for 2026 blir tildelt Simon Wågsholm.
Juryen løfter fram Wågsholm som ein kunstnar som på stillferdig vis skaper ringar i vatnet. Ved sida av ei aktiv og stabil kunstnarisk verksemd har han gjennom mange år vore ein viktig lærar, mentor og støttespelar for nye generasjonar kunstnarar.
Gjennom arbeidet ved Ytre kunstfagskole har Wågsholm spela ei sentral rolle i utdanninga av unge kunstnarar. Med høg fagkompetanse, stort engasjement og evne til å møte studentane med både tillit og varme, har han blitt ein viktig læremeister for mange.
Juryen trekkjer også fram korleis Wågsholm generøst deler av eigen kunstnarisk praksis og involverer studentar i prosjekt og utstillingar. Han blir heidra både for sitt eiget kunstnarskap og for den viktige innsatsen han gjer for å styrkje og utvikle kunstmiljøet i Ålesund.
Ungdommens kulturpris 2026 går til Carina Nørve
Carina Nørve mottar Ungdommens kulturpris 2026 etter forslag frå Ålesund ungdomsråd.
I grunngivinga trekkjer ungdomsrådet fram den store innsatsen Nørve legg ned i Fellesverket Dragen, som gir ungdom ein trygg møteplass der dei kan vere saman, få mat og delta i kreative aktivitetar.
Ungdomsrådet viser også til korleis Nørve har samla støtte og engasjement rundt Fellesverket i samband med flytteprosessen. Rådet meiner arbeidet hennar har stor betydning for ungdom i Ålesund.
– Ungdomsrådet ser arbeidet Carina legg ned for at ungdommar skal ha ein møteplass der dei kan vere saman, få mat og drive med kreative aktivitetar. For denne innsatsen og alt arbeidet ho gjer for ungdom i Ålesund, ønskjer vi å gi henne Ungdommens kulturpris 2026, heiter det i grunngivinga.
Kultur- og idrettsprisen 2026 går til Richard von Løwensprung
Ålesund kommune sin kultur- og idrettspris for 2026 blir tildelt Richard von Løwensprung.
Juryen løfter fram von Løwensprung som ein ekte eldsjel som gjennom fleire tiår har lagt ned ein imponerande frivillig innsats for kultur- og organisasjonslivet i Ålesund.
Han er særleg kjent som konferansier og sentral drivkraft bak 17. mai-feiringa i Ålesund sentrum og 17. mai-stafetten for skulane. Arbeidet utfører han på frivillig basis gjennom engasjementet sitt i Volsdalen skolekorps, eit korps han har vore knytt til sidan barneåra.
Gjennom åra har von Løwensprung bidrege som instruktør, dirigent, styremedlem og støttespelar for korpsmiljøet. Han står også bak det lokale initiativet Tubajul og har vore vokalist og gitarist i fleire musikalske prosjekt.
Juryen trekkjer vidare fram det sterke engasjementet hans for teater og kulturformidling. Han har mellom anna vore dagleg leiar i Jugendteateret, teaterlærar i kulturskulen og gjennom mange år aktiv i Serveringsteateret. Von Løwensprung er òg kjent for innsatsen sin som guide for tilreisande gjennom formidling av byens historie og kultur, og som ein sentral bidragsytar til å skape opplevingar og fellesskap for både innbyggjarar og besøkande.
Gjennom sitt store engasjement, sin innsatsvilje og evna til å skape aktivitet for andre har Richard von Løwensprung sett tydelege spor etter seg i Ålesund sitt kultur- og samfunnsliv.
– Utan tvil svært velfortente tildelingar til ressurspersonar av rang! Vi ter av oss hatten!, seier kultursjef Oscar Skulstad.
Prisutdeling i desember
Prisane blir delte ut under kommunestyremøtet 10. desember. Ålesund kommune gratulerer alle prisvinnarane med velfortente utmerkingar.