Frå 19. til 27. september fyller Høstscena 2026 Ålesund med teater, dans, film, poesi, musikk, kunst og møte mellom menneske. Festivalen samlar lokale, nasjonale og internasjonale kunstnarar og tek i bruk scener og møteplassar over heile byen.
Høstscena 2026 går føre seg i Ålesund frå 19. til 27. september.
Høstscena
Festivalen startar med familievenlege arrangement, mellom anna framsyninga Pinocchio og Den store familiedagen i Molovegen. Her blir det aktivitetar, forteljingar, tombola og gratis familiekonsert.
Mangfaldig program
Årets festivalkunstnar er Ålesund-forfattaren Bjørn Vatne. Under festivalen får publikum oppleve den nyskrivne monologen Hei, kompis, framført som iscenesett lesing med Viggo Solum.
Festivalveka opnar 23. september med eit dobbelt danseprogram der publikum får oppleve to ulike kunstneriske uttrykk på same kveld; Songs of Chaos av koreograf Roza Moshtaghi og Slow Riffs / Five Stages of Yes av koreograf Heidi Rustgaard.
Heddaprisvinner, Hivju og poesi
Programmet byr elles på eit breitt spenn av opplevingar. Publikum kan mellom anna sjå den Heddapris-vinnande framsyninga Triggersystemet med Bjørn Sundquist, urpremieren på COME NIGHTFALL, Ingmar Bergman-klassikaren Fanny og Alexander og rave med Skatebård.
Laurdag kjem Kristofer Hivju til Ålesund med HIVJU & The Garbage King, før Boksegallaen igjen kombinerer idrett, scenekunst og underhaldning på Arbeideren Kulturhus.
Gjennom festivalveka blir det òg fleire møte mellom poesi og musikk gjennom Poesiscena, som dukkar opp på ulike stader i sentrum.
Festivalen blir avslutta søndag 27. september med fleire sterke kulturopplevingar, før filmen Kjærast, regissert av Erik Poppe og basert på nobelprisvinnar Jon Fosses einaste originalskrivne spelefilmmanus, rundar av årets Høstscena.
Fullt program og billettar finn du på hostscena.no.