Onsdag 29. april markerte SFO-ane i Ålesund Den store SFO-dagen 2026. Årets tema var «Leik i sentrum», og dagen vart prega av aktivitet, skaparglede og fellesskap på SFO-ar over heile kommunen.
Den store SFO-dagen er ei nasjonal markering av skulefritidsordninga og synleggjer SFO som ein viktig arena for tryggleik, trivsel og utvikling. Ålesund kommune var tidleg ute med å markere dagen, og kommunen er glad for at initiativet no har vorte ei nasjonal feiring.
Leik, aktivitet og skaparglede
Rundt om i kommunen vart dagen markert på ulike og kreative måtar. Felles for markeringane var at barna fekk bruke heile seg gjennom leik, fysisk aktivitet, samarbeid og skapande aktivitetar – både ute og inne. Mange stader var det lagt opp til aktivitetar som tok utgangspunkt i det barna er opptekne av akkurat no, medan andre SFO-ar løfta fram både tradisjonelle leikar og nye måtar å utforske leik på.
Barna fekk mellom anna delta i hinderløyper, naturbingo, kanonball, tre-sisten, teikning med kritt, bygging med pappesker og ulike former for rolleleik. Nokre stader vart det laga eigne leikemiljø som bamsesjukehus, Leiklandia og Minecraft-inspirerte aktivitetar. Fleire SFO-ar hadde også musikk og felles samlingar som ein del av markeringa.
Fellesskap og gode opplevingar
Det var stor variasjon i korleis dagen vart gjennomført, men målet var det same: å gi barna gode opplevingar og vise fram kor viktig leiken er i kvardagen på SFO. Nokre stader inviterte dei til frukost og leik saman med foreldre, medan andre markerte dagen med grilling, pizza eller is.
SFO er ein viktig arena for fellesskap og relasjonsbygging, og Den store SFO-dagen gav ei ekstra god anledning til å synleggjere dette i praksis. Markeringa løfter fram verdiar som språk, fysisk aktivitet, kultur, samarbeid mellom skule og SFO – og ikkje minst leik.
Leiken sin plass i SFO
Gjennom leik får barna utforske, samarbeide, vere kreative og utvikle sosiale ferdigheiter. Leiken er ikkje berre eit avbrekk, men ein viktig del av utviklinga og læringa til barna.
Årets tema løfter fram noko heilt sentralt i samfunnsoppdraget til SFO. Når leiken får ein naturleg plass i kvardagen, gir det rom for meistring, deltaking og trivsel for barna.
Frå lokalt initiativ til nasjonal markering
SFO-dagen vart første gong arrangert i Ålesund i 2019. Initiativet kom frå Oddveig Hide Olsvik ved Blindheim barneskule, i samarbeid med SFO-leiarane i Ålesund. Målet var å skape ein dag der leiken står i sentrum, med utgangspunkt i at leiken er sjølve hjartet i barnekulturen. Slagordet for dagen er: «Leiken rår, barndomen består.»
Gjennom nettverket for SFO har markeringa utvikla seg vidare, og i dag vert Den store SFO-dagen feira nasjonalt siste onsdag i april kvart år.
Takk til barn og tilsette
Ålesund kommune takkar alle barn og tilsette som bidrog til ein dag full av aktivitet, latter og meistring. Den store SFO-dagen er ei viktig påminning om kva SFO betyr i kvardagen til barna – og kva vi kan få til når leik og fellesskap får stå i sentrum.