Byromsprosjektet

Prosjektet skal utvikle byromma Harald Torsviks plass, Korsatunnelen og St Olavs plass i sentrale Ålesund. Målet er kvardagsbruk, aktivitet, møter og auka attraksjonskraft til bysentrum.  

Illustrasjon viser det nye byrommet, med fontene, benker, trær og gangforbindelser - Klikk for stort bileteSlik er det tenkt at Harald Torsviksplass skal bli. Oppgraderingen skjer i samarbeid med Sparebanken Møre. Dronninga Landskap / Ålesund kommune

Byromma er grå og nokså «livlaus» slik dei står i dag. Det er lite fargar, belysning, møblar, planting og andre installasjonar som innbyr til opphald og bruk. Alle treng sårt ein rehabilitering og modernisering for å bli blåst nytt liv i, og vi må sjå på nye moglegheiter for bruk.

Byromma skal bli meir attraktive, og dei skal forsterke kvarandre ved at vi tydeleggjer betre at byromma ligg nærme kvarandre og er kopla saman i ein akse gjennom sentrum.

I 2023 vart det gjennomført ei rekke midlertidige prosjekt som testa ut byromma, og engasjerte brukarane. Samtidig henta vi inn fleire innspel og erfaringer gjennom workshops, ein innspelsportal med eigen QR-kode, og andre metoder for medverknad. Dette var grunnlaget for ein forprosjektrapport som vart ferdig våren 2024.

Sidan då har vi arbeidd vidare med detaljane i dei ulike prosjekta, og søkt samarbeid med andre aktørar i byen, både økonomisk og for praktisk samordning.  

Prosjektet er dels finansiert med tilskot frå KORO, Møre og Romsdal Fylkeskommune (Byen som Regional Motor), Sparebank 1 SMN, Sparebanken Møre samt Tafjord Kraft.  

Harald Torsviks plass

Det sentrale grepet for Harald Torsviks plass er å få tilbake fontena som var på plassen for fleire år sidan. I tillegg vil det bli planta fleire tre på kvar side av plassen, og montert fleire benkar. Både benkane og dekket får fjernvarme, og slik vere både attraktive og tilgjengelege heile året.  

I dag er Harald Torsviks plass riggplass for Sparebanken Møre i deira byggeprosjekt. Kunstverket "Bødtkern" og hellene som var underlaget på plassen er frakta vekk til ein trygg stad. Etter planen skal Harald Torsviks plass bli opparbeidd i løpet av 2027, i samarbeid med banken.

Korsatunnelen

Korsatunnelen med nytt dekke, ny lyssetting og friske fargar - Klikk for stort bileteKorsatunnelen med nytt dekke, ny lyssetting og friske fargar Dronninga Landskap / Ålesund kommune

Korsatunnelen er byrommet som etter planen skal byggast først. 

Tunnelen er i dag ein viktig snarveg, og gir ly for uvær, men er i seg sjølv ikkje særleg triveleg å opphalde seg i. I tillegg til å vere ein viktig arena for både julemarked, rave-festar og matutdeling, har tunnelen ei viktig rolle som tilfluktsrom for inntil 1000 personar. 

Det nye byrommet skal få ny lyssetting, nye fargar, oppgraderte tekniske installasjonar og eit heilt nytt og dekorativt dekke. I tillegg skal dører i kvar ende av tunnelen gjere det kjekkare å bruke byrommet, som i dag kan vere både kaldt og prega av gjennomtrekk.  

I tillegg til sjølve tunnelen er det óg eit byrom i kvar ende, der det er eigne planar for utvikling av begge. Meir informasjon om desse (som vi kallar glasrommet og sørenden) kjem etter kvart.

St. Olavs plass

Illustrasjonen viser St. Olavs plass, med ny vegtrasé og fleire sitteplassar.  - Klikk for stort bileteIllustrasjonen viser St. Olavs plass, med ny vegtrasé og fleire sitteplassar. Dronninga Landskap / Ålesund kommune

Forprosjektet viste godt potensialet St. Olavs plass har som byrom, både for sosialt samvær og til å ta seg ei pause på ein benk. Desse kvalitetane vil kommunen bygge vidare på, ved å tilføre nye sitteplassar, grøne plantar og ei meir romsleg løysing for gåande. Fleire nye parkeringsplassar langs Notenesgata erstatter plassane som blir fjerna framfor Sparebank 1 SMN. 

Dette byrommet er det som er vente å ligge lengst fram i tid, og er ikkje finansiert slik budsjettet er i dag.