- Alle elevar har rett til opplæring ved nærskolen sin.
- Hatlane skole har eit kommunalt forsterka opplæringstilbod for elevar med omfattande og samansette opplæringsbehov.
- Foreldre/føresette søker om plass gjennom kommunen sitt søknadsskjema.
- Søknadsfristen er 1. oktober.
- Tilbodet gjeld elevar på 1.–10. trinn.
Om tilbodet
Alle elevar har rett til å gå på nærskolen sin. Nærskolen har ansvar for å gi eleven eit forsvarleg og tilrettelagt opplæringstilbod.
For nokre elevar kan opplæringsbehova vere så omfattande og samansette at det kan vere aktuelt å søke plass ved forsterka opplæringstilbod ved Hatlane skole. Tilbodet er organisert av Ålesund kommune og er retta mot elevar som har behov for omfattande tilrettelegging og oppfølging gjennom heile eller store delar av skoledagen.
Målgruppa omfattar elevar med:
- omfattande og varige lærevanskar
- kognitiv svikt og/eller utviklingshemming
- samansette funksjonsnedsetjingar
- store kommunikasjons- og samspelsvanskar, mellom anna behov for alternativ og supplerande kommunikasjon (ASK)
- andre omfattande og samansette behov som krev særleg organisering og tilrettelegging av opplæringa.
At ein elev hører til målgruppa for tilbodet, gir ikkje automatisk rett til plass ved Hatlane skole. Ved tildeling av plassar blir det gjort ei heilskapleg vurdering av eleven sine behov, barnet sitt beste, gruppesamansetjing og tilgjengeleg kapasitet.
Slik søker du
Søk om forsterka opplæringstilbod ved Hatlane skole
Søknaden skal innehalde:
- sakkunnig vurdering frå PPT
- eleven sin individuelle opplæringsplan (IOP), dersom slik plan ligg føre
- årsrapport
- relevante rapportar frå barnehage eller skole
- namn på kontaktperson ved barnehage eller skole
- siste kognitive utgreiing/epikrise, dersom slik vurdering ligg føre
Kommunen kan innhente ytterlegare opplysningar dersom det er nødvendig for å behandle søknaden.
Korleis søknadene blir behandla
Eit kommunalt inntaksteam vurderer alle søknader etter at søknadsfristen har gått ut.
Ved vurderinga blir det mellom anna lagt vekt på:
- eleven sine opplæringsbehov
- sakkunnig vurdering frå PPT
- tiltak som er gjennomførte i barnehagen eller på skolen
- barnet sitt beste
- nærskolen si moglegheit til å gi eit forsvarleg opplæringstilbod
- kapasitet og gruppesamansetjing ved tilbodet
Søknadsfristen er 1. oktober, og føresette får skriftleg svar etter at inntaksprosessen er gjennomført.