Vigsel

Før de kan gifte dykk, må folkeregisteret i Skatteetaten kontrollere om ein oppfyller vilkåra for å inngå ekteskap i Noreg. Les Skatteetaten sin informasjon for norske og utanlandske statsborgarar her.

Den formelle vegen til ekteskapet blir forklart steg for steg.

Om begge har norsk personnummer, er det raskast å logge seg inn på skatteetaten.no og søke om prøvingsattest elektronisk.  Alternativt kan søknad fyllast ut på papir og sendast i posten til det regionale skattekontoret.

Dei kommande ektefellene må fylle ut kvar si eigenerklæring, det samme må forlovarane. På eigenerklæringa skriv de datoen de søker kommunen om, sjølv om tidspunkt ikkje er endeleg avtalt.

Om det er aktuelt, fyll også ut andre skjema, for eksempel melding om endring av namn og erklæring om skifte ved ekteskap.

Forventa behandlingstid i folkeregisteret er minst to til tre veker. Når vilkåra er prøvd og funne i orden, sender Skatteetaten ein prøvingsattest.

Alle spørsmål som er knytt til prøvinga må rettast til folkeregisteret ved det lokale eller regionale skattekontoret.

Prøvingsattesten, og eventuelt følgeskriv frå Skatteetaten, må vidareformidlast til Ålesund kommune seinast to veker før ønska vigselsdato. Det enklaste og sikraste er opplasting via dette skjemaet.

Alternativt kan prøvingsattesten og anna dokumentasjon leverast på næraste tenestehus, eller sendast til:

Ålesund kommune, innbyggartorget
Postboks 1521, 6025 Ålesund.
Merk konvolutten med «vigsel».

Prøvingsattesten er gyldig i fire månader, og vigselen må skje før utløpsdato.

De bestiller borgarleg vigsel i Ålesund kommune ved å skrive inn kontaktopplysningar og ønske om dato, tidspunkt og språk på dette elektroniske skjemaet. 

Vi minnar om at i Ålesund sentrum på seremonirommet er det vigslar fredagar i partallsveker og i 2025 Valentinsdagen den 14.02.

Bestillinga kan skje fleire månader på førehand, men detaljar blir endeleg avtala når kommunen har mottatt prøvingsattesten og vigselen nærmar seg.

NB: Det vert ikkje høve å gjennomføre vigsel i veke 16, 22, 29, 30 og 31, 32 og i veke 51 og 52.

Om de ikkje er busett i Ålesund kommune og ikkje har vigselen i ett av våre seremonirom i ordinær tid blir prisen tilsaman 6209,- 

Brudefolk, forlovarar og gjestar bør møte opp ved seremonirommet tidlegast 10 minutt før avtalt tid for vigsel.

Legitimasjon må visast fram på vigselsdagen før sjølve seremonien kan starte. Vi godtar gyldig pass, eller norske førarkort/idkort og norske bankkort med bilde og personnummer.

Utenlandske statsborgarar må vise fram pass. Asylsøkarbevis er ikkje godtatt som legitimasjon.

Det skal vere to vitne til stades under seremonien. Dette er vanlegvis forloverane, men det kan også vere to andre myndige personar. Vitna skal vere med og underteikne vigselsprotokollen/prøvingsattesten.

Kommunen kan gjennomføre vigselen på norsk eller engelsk. Meld fra dersom de verken forstår norsk eller engelsk, slik at vi kan stille med kvalifisert tolk.

Her finn de det borgarlege vigselsformularet som vigslaren les opp.

Sjølve seremonien varer i 10-15 minutt. De blir vist inn i seremonirommet saman med gjestane. Sjølve vigselen skjer ved at vigslaren les ein fastsett tekst for borgarleg vigsel.

Ho/han les gjerne også eit dikt, dersom de ønsker det.

Deretter blir de spurt om de vil ha kvarandre til ektefellar. Så erklærer vigslaren dykk som ektefolk. Til slutt må vigselsprotokollen skrivast under av dykk, vitna og vigslaren.

Det er ikkje lov å drikke alkohol, eller å kaste ris, roseblad eller konfetti, i eller utanfor seremonirommet.

Det er høve til å sette på ringar under seremonien. Gi beskjed om dette før seremonien startar. Ringene kan settast på når vigslaren har erklært dykk som ektefolk. Vigslaren sier frå når ringane kan utvekslast.

De kan gjerne ha musikk eller diktlesing under seremonien. Dette må de sjølve organisere. Gi beskjed på førehand.

Tida som er sett av til seremonien, underteikning og fotografering er til saman 20 minutt. Det er viktig å halde tidsramma, fordi det ofte er andre par som ventar på å gifte seg.

Fotografering kan skje under og etter seremonien, i forståelse med paret og vigslaren.

Prøvingsattesten som brudeparet, vitna og vigslaren underteiknar blir vanlegvis sendt til Skatteetaten same dag som vigselen skjer. Paret kan få med seg ein kopi av attesten, som ein midlertidig vigselsattest.

Skatteetaten sender ein stadfesting til begge to i Altinn når ekteskapet er registrert i Folkeregisteret. Hvis de ikkje er digitale brukarar, vil Skatteetaten sende dette til dykk i posten. Det kan ta litt tid at Skatteetaten registrerar vigselen. Hvis de har behov for en vigselsattest kan det bestilles hos Skatteetaten. Alle spørsmål om vigselsattesten må rettast direkte til Skatteetaten.